Tema :

Mamre Simelumbar Mere

Tujuan : Gelah Mamre :
1. Meteh maka biak Mamre eme melumbar mere.
2. Ngasup mere alu meriah ukur.

Metode :

Aksi

I. Kata Penaruh
Nggeluh ermalem ate ntah pe ndatken pasu-pasu eme sura-sura, arapen ras perayaken umumna kerina jelma. La ketadingen Mamre, perbapan GBKP pe ersura-sura gelah nggeluh ermalem ate. Bahken seh ku nggeluh malem kal ate. La lit jelma, la lit perbapan ersura-sura ras ndarami gelah nggeluh mesera dingen rate mesui. Bicara lit kin pe enggo banci ibaba ku dokter jiwa gelah iperiksana. Kerina si ipikirken kita, si isuraken, si irencanaken, si idahiken ras usahaken kita tujunna gelah si dat malem ate. Saja megatisa nggeluh ermalem ate e ibatasi kalak terjeng erta, duit ras kinibayaken ngenca. Adi mbue kenca serpi ras kebayaken jelma, minter ikataken atau icap ia sebage kalak si ermalem ate. Nggeluh ermalem ate la kepe terjeng melala duit, mbue kiniliten ras kebayaken materi ngenca. Pustaka Si Badia ngajarken dampar si deban kerna kemalemen ate janah ituduhken dingen iajarkenna kerna kemalemen ate si tuhu-tuhu. Kemalemen ate si tuhu-tuhu idatken ras ialoken kalak si mehamat ras erkemalangen man Dibata. Uga maksudna kalak kalak si erkemalangen man Dibata nge si ndatken kemalemen ate si tuhu-tuhu? Guna lebih jelas dingen tangkasna, marilah si pelajari dingen si siksiki Kata Dibata arah PA ta.

II. Isi/ Tafsiren
Erkemalangen man Tuhan ertina tek man Tuhan, erpengendes man baNa, ernalem ras erpengarapen tetap man baNa. Erkemalangen man Tuhan seri ertina ras ermeriah ukur ngikutken perentah-perentahNa. Erkemalangen man Tuhan ertina lanai mengandalken gegehna si sada, lanai perayakenna terjeng doni saja ngenca tapi terlebih man Tuhan. Kalak si ngaloken Jesus Kristus jadi Tuhan ras JuruselamatNa ialokenna kap biak Dibata. Biak-biak Dibata e me: bujur, adil, perkuah dingen perkeleng (ayat 4) jadi biakna si mbaru. Emaka kalak si erkemalangen man Tuhan igelari pe kalak bujur, adil, perkuah ras perkeleng. Kita bujur labo erkiteken kebujurenna, tapi kebujuren Dibata ntah pe Dibata si bujur ras benar si erbahanca ia jadi kalak bujur. Emaka man kalak si enggo ngaloken biak Dibata enda ndai me maka ersinalsal terang ibas si gelap nari.
Kalak bujur teridah arah melumbar mpepinjamken, melumbar mere. Malem kal atena erkiteken melumbar ia pepinjamken dingen bujur ibas kerina urusen (ayat 5). Kalak bujur la ngukurken dirina ras sekerajangenna saja. Erkiteken si e kalak bujur asa ndigan pe labo ia guling, ia tetap iinget rasa lalap (ayat 6). Kalak bujur la perbiar. La ia mbiar ngaloken berita si la mehuli sabab kinitekenna paguh dingen ernalem ia man Tuhan (ayat 7). La ia mbiar dingen la aru atena, tek ia maka talu kap imbang-imbangna (ayat 8). Erkiteken ia mbiar man Dibata emaka lanai ia mbair man kai pe. Payo kal kata enda. Ise si mbiar man Dibata maka lanai perlu mbiar man kai pe si banci jadi bas doni enda. Sabab Tuhan enggo kap naluken kerinana. Sebalikna si la mbiar man Dibata, geluhna dem ibas kebiaren. Mbiar ia megi berita si la mehuli, aru atena kerna geluhna, ras mbiar ia talu ibahan imbang-imbangna. Melumbar pemerena man kalak si kekurangen. Kinibujuren kalak bujur lalap lit, ia ermulia dingen ihamati (ayat 9).

III. Aplikasi/ Pengkenaina
1. Payo kal maka kalak si erkemalangen man Tuhan eme kalak si ketuahen (ipasu-pasu Dibata). Si enda enggo ipetangkas Tuhan Jesus ibas khotbahna i uruk (Matius 5:3-11). Nina Tuhan Jesus, “Ketuahen kalak si nggejap maka ia labo kai pe ertina i lebe-lebe Dibata; sabab man bana me Kinirajan Surga” (Matius 5:3). Adi ateta nggeluh ketuahen (ermalem ate, ipasu-pasu Dibata mari dage erkemalangen tetap man Tuhan. Dibata rembak kap ras kita si erpengendes ras ernalem man baNa. Dibata si nemani ras nampati kita katawari paksa pe. Dibata me si jadi ulu geluhta. Lanai gegehta, beluhta ras pemetehta saja.

2. Kita si erkemalangen man Tuhan, biakNa jadi biakta. Kita jadi kalak bujur ras benar. Kalak bujur teridah arah nggit mere ras melumbar mere. Kita mere erkiteken tek kita ras si gejap pe maka Dibata enggo leben mere man banta. PemereNa si mbelinna man banta eme keterkelinenta ibas ukumen si rasa lalap nari eme kematen pertendin (Joh 3:16). Janah la terjeng pasu-pasu pertendin ngena iberekenNa tapi pe pasu-pasu jasmani guna keperlun kegeluhenta si tep-tep wari.

3. Sebage anak-anak Dibata si mehuli milikilah “mental berkelimpahan” bas kita. Ula “mental kekurangan” si asuhi bas geluhta. Mental kelimpahen me si erbahanca geluhta ngasup ngataken bujur man Tuhan, ngasup muji ras mpermuliaken Dibata. Mental berkelimpahan me si ngena ate Dibata dingen si ipindoNa bas kita nari. Mental berkelimpahan erbahanca kita ngasup mere bagi si ngena ateNa. Mental berkelimpahan erbahanca ersuruh ukurta mere ras melumbar dingen meriah pe si akap mere man kalak si perlu, membutuhken (2 Korinti 9:7a).

4. Lit program Mamre si enggo si sepakati bersama si igelari “Beasiswa Mamre”. Arah beasiswa Mamre enda me kita Mamre nampati anak-anakta bas gerejata GBKP sedoni si la mampu orangtuana nekolahkenca. Tutus kal atena sekolah, lit kengasupenna erlajar gelah erpemeteh. Tapi tertobeng sekolahna perbahan la ngasup orangtuana si mupus ia. Ibas si e Tuhan nuruh kita lako ndudurken tanta guna nampati ia. Bukalah dompetta bereken penampatta. Malem me ateta ibas kita nggit mere lako nampati arah beasiswa Mamre enda. Malem ateta banci kita nampati. Malem ateta kita jadi saluren pasu-pasu arah pasu-pasu si enggo ialoken kita. Malem ateta adi anak-anakta si man sampaten e pagi seh sekolahna, erpemeteh ia, pentar ia janah datna pendahin si mehuli.

5. Teklah keleng ate, kiniulinta ras pemereta arah kita muat bagin mere alu melumbae e la pernah sia-sia. Keleng ate e tahan seh rasa lalap. Keleng ate me si mbelinna (1 Korinti 13:13). Banci saja labo anak-anak si sampati kita e pagi ersimulih man banta. Banci jadi labo si tandai pe anak-anak si isampati kita arah program beasiswa enda janah ia pe labo nandai kita. La masalah. Si penting kita enggo jadi penampat man bana. Dibata jine alu caraNa si la terukuri kita si ersimulih man banta. Tetaplah jadi pancur pasu-pasu man si perlu penampat ras pemereta.

Pdt. Juris Tarigan, MTh

(GBKP Depok – LA; 081316879945)

Bahan :

Mazmur 104:1-24

Thema :

DONI ENDA SEH ULINA

1. Dibata njadiken doni enda seedekha enem wari, emaka ibas wari pepituken Dibata masu-masu kerina si enggo ijadikenNa, janah i tatap Dibata kai si enggo ijadikenNa mehuli (Kejadin 1 ras 2). Emaka diantara ciptaan e maka manusia me si terakhir i jadikenNa, gelah kehadiran manusia e enggo lengkap kerinana sini ibutuhken manusia (sandang, pangan, papan). Manusia ndai eme ciptaan si mulia, sebab ia segambar ras si nciptakenca(Dibata)(Kej 1:26-28). Emaka nina man Dibata man manusia ndai: Ertuahlah jadi enterem demi doni ras taluken isina. Tapi perlu si eteh maka manusia si jadiken e lit kuasana atas nurung, perik ras kerina binatang (Kej 1:26). Kerina ciptaan e salin g keterkaiten, baik baik si daraten, langit ras lautan, ertina ia saling membutuhkan guna kelangsungan kehidupanna,tapi utamakel eme guna kiniulih manusia ndai. Emaka manusia wajib njagai kerina tinepana gelah kelangsungen hidup bas doni enda mehuli jadina. Adi mehuli ciptaan si lit manu sia sejahtera, sehat jasmani, sehat rohani. Tapi adi hancur sinasana maka manusia pe ikut hancur.

2. Mazmur 104 enda eme merupaken pengulangen Kejadian 1-2 ndai, ija pemazmur ngingetken man kalak si erkiniteken:
a. Kerina sinasana silit ibas doni enda maka Dibata si njadikenca
b. Janah Dibata si erkuasa nandangi tinepana seh genduari
c. Janah Dibata ka si mpersiapken si jadikenNa guna kepentingen, saling membutuhken
d. Manusia patut bangga nandangi kai sinibahan Dibata
Sungguh luar biasa kuga Dibata mpersiapken sinasana bas doni enda, emaka ngidah sie takjubnge kita sabab laterpikirken manusia kai si jadie, tapi si ejadi kenyataan ban Dibata. Banci si idah maka kerina si ijadikenNa sempurna ras saling membutuhken, bagepe Dibata tetap erkuasa nandangi kai si jadikenna e. Emaka kai atena banna mis jadi, misalna ay7, nergangi lau mis ia kiam, hal enda banci si idah kuga Dibata membelah laut waktu bangsa Israel ndarat i Mesir nari (Keluaran 14).
Bagepe ibas si jadikenNa e saling membutuhken: lagit nari nusur udan, turah dukut, man me rubia-rubia, minem ia, bagepe manusia banci nuan-nuan adi enggo nusur udan erkiteken taneh enggo mehumur. Adi berngi lit bulan, bintang guna nerangi si gelap, adi suari lit matawari guna mengeringkan sibasah, sempurna lah si lit ndai.

3. Manusia me si termulia diantara ciptaan, emaka manusia harus njagai dingen ngerawat doni enda ras isina, baik daraten, lautan ras awang-awang. Adi la irawat makabanci nge reh ken bencana: Banjir, polusi udara, pencemaran laut, emaka dampakna man manusia.
DONI ENDA SEH ULINA

Themanta sendah tole ngingetken kita gelah si pekena-kena doni enda, sebab ibas doni enda kita tading, kita erusaha, kita beribadah, kita bercanda gurau, ras sidebanna.
Cuba si ulih-ulihi ngendeken KEE No 262:1,2 Bagepe KEE No 26:1-3, ma teridah doni enda i jadiken majile, tapi akibat manusia maka doni enda enggo ceda. Ise mge banci pehuli... ? tentuna kita nge manusia ka sibanci pehulisa . Lit selogan: Kebersihan adalah sebagian dari iman, enggo payo, tapi ningku menjaga ciptaan Tuhan adalah IMAN. Si la njaga labo ia erkiniteken man Dibata.

Pdt. Andarias S.Brahmana

081317054961
Selamat PJJ

Tanggung Jawab Ibas Jabu
(Kolose 3:18-21)

Kata Penaruh
Jabu eme “persadan” simetuana ijadiken Dibata. Jabu eme persadan si kitik menentuken kerina keadaan kegeluhen, erbangsa ras ernegara, ermasyarakat ras ergereja. Adi kerina jabu banci ngaturken anggota jabuna alu mehuli, dingen nggeluh bagi arusna maka lanai lit “kinigutulen” ras kebiaren ibas geluh enda.
Emaka ibas tradisi kalak Yahudi “pendidiken bas jabu” jadi pilar pembentuken bangsa si megegeh. Fungsi jabu lebih asa fungsi sekolah ras gereja ibas nuanken “pemeteh ras prilaku nggeluh”. Adi si baca ibas Ulangen 6:4-9 maka pendidiken si terpenting eme nuanken “kemalangen man Tuhan”, sebab erkemalangen man Tuhan eme ulu kerina pemeteh ra kepentaren (bd. Masmur 111:10; Kuan-kuan 1:7) . Janah kerna sie labo ipercayakenna man pihak lembaga si ngurusi kerohanian, tapi jadi dahin si “penting ibas jabu”, emaka nina “ajarkenlah e alu mulih-ulih, sanga kam kundul-kundul, sanag kam bas perdalinen, sanga kam medem-medem. Harus iiketkenndu ibas tandnu, ras tamaken e ibas perdempakenndu, tulisken ibas binangun pintu rumahndu ras tiang pintu gerbangndu.
Arah bahan perpulungen jabu-jabunta sendah ipersingeti ka kita uga maka kerina anggota keluarga e banci ndalanken tanggung jawabna, sebab adi kerina anggota keluarga ndalanken tanggung jawabna, lanai kai pe lit si jadi persoalen.

Tanggung Jawab Ibas Jabu
1. Ndehara (ay. 18)
Tanggung jawabna eme “patuh man perbulangen”. Ijenda banci mis kita si jababen ban moria e, “banci kami patuh adi .... “
Tapi erpalasken Pustaka Si Badia, maka sekalak ndehara harus patuh man perbulangenna sebab perpulangen nge takal ndehara bali ras Kristus takal perpulungen( Epesus 5:23), terdauhen ituriken ibas 1Petrus 3:1”Patuhlah man perbulangen, gelah adi perbulangen “ la tek” nangdangi Kata Dibata, banci ia tek. Ijenda igaris bawahi adi lit perbulangen “la tek man kata Dibata” ijenda igambarken kepatuhene labo erkiteken perbulangen e enggo “sempurna” tapi justru kepatuhen ijenda gelah maba pertobaten man perbulangen. Alu bage lanai lit si begi istilah “banci aku patuh adi memang layak ipatuhi adi lang uga pe lah ningen kami patuh”. Ibas kitap Epesus 5:21“patuhlah sekalak man si debanna erkiteken kam mehamat man Kristus”. Jadi kepatuhen e erpalasken “kiniteken” labo erpalasken cocok siakap entah lang.

2. Perbulangen (ay. 19)
Ngkelengi ndehara ras Ula kasar man bana. Ngkelengi ijenda mbue jenisna. Perbulangen harus engkelengi ndeharana bagi Kristus engkelengi perpulungen. Tanggung jawab perbulangen ijenda eme mereken geluhna “totalitas” guna ndehara bagi Kristus “totalitas” ngendesken geluhna guna perpulungen. Kristus engkelengi perpulungen tersirat arah:
1. Mere man (bd. Yoh. 6:35) tanggung sekalak perbapan bas jabu eme encukupken keperlun kegeluhen.
2. Mere kenyamanen, kesejuken ras kepuasen, seh maka lani muas (bd. Yoh. 4:14), kejahaten-kejahaten si terjadi ibas geluh enda erkiteken ndarami kepuasen sebab kerina “muas/haus”. Tanggung jawab sekalak perbapan bas jabu uga maka kerina isi jabu e “puas ras lanai muas” seha maka kerina isi jabu e lanai terjebak ibas ndarmi kepuasen-kepuasen i darat rumah.
3. Mereken “terang” (Yoh. 8:12) tanggung jawab perbapan ibas jabu eme uga maka seisi jabu e la “tertukutuk, la tersesat” ibas ndalani dalan kegeluhen. Terang e pe sekaligus mereken semangat (motivasi) man sisi jabu guna terang ngidah ku masa depan.
4. Mereken keteladanen nggeluh, gelah ieteh anak jabu e arah dalan siapai si harus idalanina, gelah seh kubas kegeluhen si damai ras senang (bdk. Yohanes 14:6) .
5. Jadi permakan (bd. Yoh. 10:11)sekalak perbapan terus njagai anak jabuna nggeluh ibas dame ras keriahen (bd. Mas. 23), mabasa ku mbal-mbal, ertina ngelepasken perberkat anak-anak alu pertoton, bage pe ibas karaben wari mabasa mulihi ku karang (ku rumah) je nari adi lit si lalar idarami, iperiksa sada-sada entah lit si terluka, gelah banci itambari ras ibaluti lukana. Ban buena kesibukenta selaku perbapan lanai kap si eteh pe katawari anakta berkat ras mulih kurumah, lanai si eteh entah enggo lit luka (pusuh) sebab adi luka jasmani uga pe mis ia ngata man banta jenari mis si tambari, tapi luka pusuh si ibahan dosa megati lanai sempat kita nungkuninsa, padahal kematen si meratna labo ban luka jasmani tapi luka pusuh siibahan dosa.
6. Ngelai ras ngendesken Kesahna (Mat. 20:28) tanggung jawab sekalak perbapan eme “uga maka banci malem ate anak jabuna ras uga maka kerina banci terkelin” arah kata sienda maka sekalak perbapan lanai banci mengorbanken anak jabuna erkiteken “kesenangen pribadina”, harusna kai pe ilakoken gelah jabu e banci terkelin.

3. Anak (ayat 20)
Megati is begi istilah “anak pe nganaki” encidahken kesetresen orang tua ibas ngajarken anak. Ngidah buena anak si lanai terajarken, emaka megati kel ibahan orang-orang tua seminar-seminar pendidiken man anak, seminar “kenakalen-kenakalen anak remaja”, tapi jarang kel si begi seminar “kenakalen orang tua”. Banci jadi erkiteken la kita ngasup ndalanken tanggung jawabta bagi si datas ndai “ndehara pe la patuh man perbulangen, akapna ia rusur kepala e, ia atena rusur ibegiken, la kenca bage berjut, merawa rsd. Perbulanegn pe la ka totalitas mereken kegeluhenna guna kemalemen ras keterkelinen jabu, terjebak kubas ndarami kepuasen-kepuasen pribadi, piah dungna anak pe ndarami kepuasenna saja.

Arah renungenta sendah maka selaku anak harus patuh man orang tua, sebab orang tua me wakil Dibata mereken kegeluhen man anak, orang tua me wakil Dibata encukupken kerina keperlun anak, jadi wakil Dibata maba anak e kubas keterkelinen. Perlu pe ieteh anak-anak maka labo lit orang tua si ersura-sura encelakaken anakna, emaka adi lit peraturen-peraturen si ibahan orang tua ula ka akapna e “merampas kemerdekaanna, tapi igejapnalah e sada usaha pendisiplinen ra pembentuken karakterna, ula ka iakap anka-anak adi salah ia irawai enggo menjajah hak azasina. Sebab adi la kin irawai orang tua nakna si ersalah, isampatina kap meneken anakna e (bdk. 2 samuel 14 “Aku jadi bapana, janah ia jadi anakKu. Sanga ibahanna salah, Kuukum ia bali ras sekalak bapa ngukum anakna; Kuan-kuanen 23 :13-14 “Ola kam biar-biaren ndidik anakndu, adi ipekpekndu ia labo ia mate, tapi selamat”)

Kesimpulen :
Jabu si ndatken kemalemen ate eme jabu si anggotana kerina nggeluh ibas ndalanken tanggung jawabna. Ijenda labo perlu si ukuri ise si mberatna tanggung jawabna ras ise si menanhangna tanggung jawabna. Tapi masing-masing harus rukur uga maka kerina naggota keluarga e ndatken kemalemen ate.
Sada anggota kelurga la ndalanken tanggung jawabna maka kerina anggota keluarga e rate mesui (kena imbasna).
Ijenda tempa tanggung jawab perbapan si mbelinna ibas jabu, janah memang kin bage nge arusna, saja man ndehara sebagai mitra perbulangen maba jabu e jadi persembahen si merimna man Tuhan, maka kai ka si isuruh perbulangen maka ia pe harus ka patuh. Alu bage enggo ka mbue turunen patuh ndai, emaka lit kalak si nulisken makalebih kurang lit 40 tanggung jawab ndehara bas jabu. Enggo termasuk tanggung jawab sebagai ndehara ras tanggung jawab sebagai nande (bdk. Kuan-kuanen 31 :10-30)

Pdt. Saul Ginting

GBKP Runggun Bekasi