Perbahanen Rasul-rasul 26:19-23

Tema: NURIKEN KERNA JESUS MAN KERINA JELMA

(Sehna berita simeriah)

I. KATA PERLEBE

Bahan PJJ ta sekalenda ihubungken sehna berita simeriah ku taneh Karo. GBKP genduari umurna enggo 135 tahun si awalna mbarenda kerina biaya pelayanenna ibebanken ku kas Zending (NZG) entah pe organisasi penginjilan Zending Belanda. Tapi kenca perang dunia II terjadi erbahansa terjadi krisis ekonomi janah kas bas Zending lanai lit emaka mau tidak mau GBKP harus membiayai pelayanenna sendiri. Tentu adi siinget ka 84 tahun si lewat pasti megogo nge ateta ngidah pelayanen GBKP si erpala-pala ngaturken pelayanen ibas GBKP enda. Muat Pendeta si banci melayani pe seh serana, mperidiken jemaat pe la piga si nggit janah si nggit jadi pertua-diaken pe labo piga. Pendeta si melayani pe ncukupken bana arah kai si lit, rsd. Amin bage gia serana soal keuangen, soal pelayan, soal jemaat tapi penemani Tuhan e seh kel belinna seh genduari GBKP enggo seh teremna jemaatna ras Pendetana bagepe pertua-diaken ras pengurus kategorialna bahken pe kerina jemaat ikut enggo muat bagin ibas erberita si meriah.

Arusna adi siinget 135 tahun silewat seh na berita si meriah ku tanah Karo janah adi siinget 84 tahun si lewat kita njayo arusna serayaan ras jemaat GBKP pasti sitatang-tatangen ibas maba geluh enda. Tapi apakah sienda jadi erkiteken kita pe labo meteh ugakin sejarah GBKP enda maka melala denga kalak si la mediate nandangi dahin-dahin i tengah-tengah gerejanta GBKP enda. Apakah erkiteken kita sebagai kemahen Tuhan ras ngawan perpulungen GBKP enda pe labo sieteh uga serana nai mberitaken berita si meriah ku kalak Karo enda maka enterem jelma kurang tanggungjawabna man GBKP enda. Emaka nina Sukarno: “Jangan lupakan sejarah. Bangsa yang besar adalah bangsa yang mau menghargai jasa pahlawannya, tentunya masyarakat dapat mengenang perjuangan pahlawannya melalui SEJARAH BANGSANYA.” Arah bahan PJJ ta enda iajari kita uga kita nggejapken kerna penemani Tuhan ibas sehna berita si meriah bas GBKP enda seh maka kita nggit ka muat bagin ibas nuriken berita simeriah eme kerna Yesus man kerina manusia.

II. PEBAGESI PENGANGKAAN KERNA TEKS

Teks enda nuriken kerna uga Paulus itangkap erkite-kiteken nehken berita simeriah janah ibereken kesempaten man Paulus guna mbela dirina. Paulus nuriken masa laluna selaku kalak Parisi si fanatik (4-5). Ija paksa sie menurutna maka nggo itehna kerna kebenaren situhu-tuhu arah ngelakoken hukum taurat. Emaka man bana, ngajarken kerna Kristus sada hal si la mungkin. Emaka iakapna pengajaren enda arus ilawan (9). Labo ateta mamang adi iakapna kewajibenna guna ndarami ras ngkernepken pengikut Kristus (10-11). I tengah-tengah misi e, Jesus ibas kemulian ncidahken diriNa man Paulus. Enda me titik balik kegeluhenna si mabai ia ku pertobaten (12-15). Ia ngenanami perubahen si radikal, pembaliken i bas kegelapen nari ku terang, i bas kematen nari ku kegeluhen, ibas musuh Kristus nari jadi pengikutNa, bahkan jadi perberita gelarNa.

Paulus jadi saksi Kristus sebab eme tujun Yesus mpetandaken dirina man bana (16-18, bdk. Perbahanen Rasul-rasul 9:15). Meriah ukurna nuriken si enda kerina man raja Agripa (2). Labo hanya erkiteken banci ibuktikenna maka ia la ersalah, tapi pe erkiteken ibas ngelakokenca ia banci meritaken berita si meriah. Enda nuduhken man banta maka ibas keselamaten siibereken Dibata man banta, lit sura-sura Dibata gelah kita pe mberitaken keselamaten e sebage pemere Kristus man kalak sideban. Kita idilo guna tek man Kristus, labo saja gelah kita sendiri jadi pengikutNa, tapi gelah kita pe mpeseh berita si meriah enda man kalak si deban. Emaka ula terjeng sinik saja nikmati keriahen keselamaten e tapi agikenlah keriahen ukur e man kalak si deban pe!

Man Paulus, kekeken Kristus penting kal i bas geluhna. Erkiteken perjumpaanna ras Kristus si enggo keke (14-15), erbanca dalan kegeluhen Paulus berubah secara radikal: i bas pembunuh nari jadi pemberita kegeluhen si rasa lalap; i bas ‘duta’ kalak si pentang nandangi kebenaren seh ku duta Dibata guna mbuka mata kalak pentang gelah idatna kebenaren ilahi (16-18). Perjumpaan ras Kristus si enggo keke enda labo terjeng menghasilken perubahen si radikal sementara, tapi Paulus tetap setia mengisi kegeluhenna alu ketutusen, kuasa, ras pendahin si sendalanen ras misi si ialokenna i bas Kristus si enggo keke ibas si mate nari (19-20). Berita kebenaren si rusur ipesehna eme Kristus si enggo mate ras keke sue ras nubuaten nabi-nabi si leben, jenari maba terang man kerina bangsa.

Paulus nuriken kerna titik balik teologisna i lebe-lebe Raja Agripa. Iturikenna pengalamenna jumpa ras Yesus ibas rupa terang (12-15). Ibas percakapen ras Yesus, ia ndatken mandat guna meritaken berita si meriah man kalak si labo kalak Yahudi (16-18). Mulai je nari, Paulus la pernah mundur ibas pendilona. Tapi, justru erkiteken pendilo enda me maka iseret kalak Jahudi ia ku pengadilen (21). Tapi, Paulus tetap erkiniteken. Tek kal ia maka kai si itekina labo bertentangan ras tradisi (22-23). Paulus si sedekah enda penindas jelma sinterem, genduari berubah jadi perberita kebenaren. Erkiteken sie, aminna gia Paulus iadili erkiteken meritaken berita si meriah kerna Yesus, sitik pe la ia mbiar, bahken ijadikenna ingan pengadilen e jadi kesempaten nuriken kerna berita keselamaten kerna Yesus.

Perjumpaan ras Jesus jadi titik si penting i bas perdalanen geluh Paulus. Momen e erbahanca perukuren ras perbahanenna terbalik. Kacamata si ipakena guna ngenehen doni enda berubah tuhu-tuhu. Lengkungen gerak bahtera kegeluhenna melengkung ku arah si berlawanen. Kerina dampar kegeluhen Paulus si erpalasken kekeken Kristus, mulai nai nari, genduari, ras masa si reh enggo lit i bas terang kekekenNa, seh maka banci mpengasup Paulus jadi alat guna meritaken Berita si Meriah. Kegeluhen, pengabdian ras pendahinna jadi bermakna labo saja man dirina tapi man masyarakat pe.

III PENGKENAINA

Temata Minggu enda eme Nuriken Kerna Yesus Man Kerina Jelma. Arah tema enda ngajarken man banta maka kalak si erkiniteken arusna kin jadi gaya hidupna ibas nuriken kerna Yesus man kerina jelma si teridah arah pengerana ras perbahanenna. Bagi Rasul Paulus singgejapken maka uga Tuhan nelamatken ia arah konsep si salah kerna keselamatensi erbahanca kegeluhenna salih ibas manusia lama jadi manusia si mbaru.

Arah bahan PJJ ta enda ngajarken man banta maka kita idilo guna tek man Kristus, labo saja gelah kita sendiri jadi pengikutNa, tapi gelah kita pe mpeseh berita si meriah enda man kalak si deban. Ertina jadi kalak si erkiniteken la banci terjeng sinik saja nikmati keriahen keselamaten si enggo bereken Dibata man banta, tapi keselamaten si enggo sialoken bas Dibata nari e harus si bagiken man kalak kerina jelma.

Emaka selaku ngawan perpulungen GBKP marilah kita kerina pe nginget kerna sejarah pelayanen ras perjuangen ras pengorbanen Pendeta-pendetata si reh i Belanda Nari si tergabung ibas NZG (Nederlandsch Zendeling Genootschap) si tuhu-tuhu berusaha kalak Karo banci ndatken pendidiken, kesehaten ras terlebih-lebih ndatken keselamaten bas Tuhan Yesus nari. Janah gendari enggo 135 tahun GBKP, tentu gendari, paksata ka me guna nerusken nehken berita si meriah enda ku belang-belang doni enda.

Emaka arusna lanai waktuna kita membahas soal masalah-masalah intern gereja, tapi arusna kita enggo lebih melala ercakap kerna program-program ibas nehken berita si meriah. Marilah kerina kita sibenaken ibas keluarga nari, nuriken berita kerna Yesus janah teridah arah pengerana ras perbahanenta. Emaka siarus silakoken gelah ngasup kita maba berita si meriah enda ku belang-belang doni enda, nina ibas Perbahanen Rasul-prasul 2:42 lit telu hal siharus silakoken eme:

1. Tutus megiken kata Dibata.
2. Nggeluh sikeleng-kelengen bagi si ersenina
3. Ras-ras encepik-cepik roti dingen ras-ras ertoto man Dibata.

Adi si telu hal enda sipakeken bas kegeluhenta, nina ibas ayat 47, ”Ipujina Dibata janah kerina kalak erngena ate man perpulungen e. Tep-tep wari itambahi Tuhan ku perpulungen e kalak si iselamatkenNa.

OGEN: 1 KORINTI 2:6-16

TEMA: IBAS KITA LIT KAP KEPENTAREN DIBATA

(Sidang Majelis Sinode)

I. KATA PENARUH

Secara umum, genduari lanai kel terbedaken kita apain kalak si erkiniteken janah apai kalak si la erkiniteken adi sinen arah cara ngerana ras perbahanenna. Emaka zaman genduari enda ukur kalak mehuli pe banci jadi dungna iakap kalak jahat ukurna erkiteken megati kalak salah duga. Emaka bas rumah sakit, bas pelabuhen, bas bandara, stasiun-stasiun, melala kalak memilih diam dan tidak mencampuri urusen kalak sideban. Alu kata sideban secara perukuren manusia perbahanen si mehuli pe genduari lenga terjamini maka sekalak jelma e erkiniteken, banci saja lit sura-surana maka ilakokenna simehuli.

Bahken berita-berita bas televisi pe si belakangen enda, lit piga-piga iberitaken kerna piga-piga pendeta si terlibat ibas pembunuhen, kekerasan dalam rumah tangga, rsd. Bahken pe, percakapen-percakapen ibas sidang-sdiang gereja pe, subuk ibas diskusi, megati lanai teridah maka sidang e sidang gereja arah cara ngerana ras cara nanggapi subuk simimpin sidang bagepe peserta sidang.

Tapi secara kiniteken kita iajuk maka kalak si erkiniteken arus cidahkenna kinitekenna e arah perbahanenna. Situhuna kerina kalak si enggo bengket kubas Kristen enggo pernah ia erpadan maka cidahkenna pagi kinitekenna e arah perbahanenna. Sebab kerina kalak ialoken, ingawanken, pridin mbelin, itangkuhken, ilantik, rsd, kerina erpadan maka cidahkenna pagi kinitekenna e arah perbahanenna alu ndalanken kerina si isungkun man bana. Emaka arah bahan PJJ ta enda mari dage erlajar kita uga kin ikataken bas kita lit kepentaren Dibata ras kai pengaruhna kubas carata nggeluh bas doni enda.

II. PEBAGESI PENGANGKAAN KERNA TEKS

Surat Rasul Paulus si Pemena man kalak Korinti enda itulis erkiteken lit turah per-soalen-persoalen kerna kegeluhen ras kiniteken Kristen i bas gereja si enggo ipanteki Rasul Paulus i Korinti. Sanga si e Korinti e me sada kuta si mbelin si iingani erbage-bage bangsa, jadi ibu kota propinsi Akaya, jajahen Roma. Kuta e terkenal erkiteken perbinaganna, kebudayanna si megah, lagu langkah si la mehuli si enggo biasa, ras agama-agama si erbage-bage si lit i bas kuta e. Persoalen-persoalen pokok si man hadapen Rasul Paulus e me kerna per-pecahen-perpecahen ras lagu langkah si la mehuli si lit i bas perpulungen, kerna lagu langkah perjabun, soal-soal penggejapen, aturen-aturen perpulungen, pemere Kesah Si Badia, ras kerna kekeken i bas si mate nari. Alu perukuren si mbages icidahken Rasul Paulus maka Berita Si Meriah banci ndungi soal-soal si enda kerina.

Ibas bahan PJJ ta enda icidahken Rasul Paulus man kalak Korinti maka aminna pe ia labo reh ndahi kalak e alu kepentaren manusia, ntah pe alu pemeteh ras sastra si ibanggaken kalak Jahudi ntah pe kalak Junani paksa sie, tapi iberekenNa man kalak e sada erta kepentaren si tuhu-tuhu ras si meganjangna. Siberitakenna kerna kepentaren i tengah-tengah kalak si enggo dewasa (ay. 6), e me i tengah-tengah kalak si tuhu-tuhu ngantusi kiniteken Kristen ras enggo seh ku kedewasaan i bas hal-hal Dibata. Kalak si menganggap pengajaren e sebage pengajaren ilahi, janah kenca iterangi Kesah Si Badia, maka ipelajarina alu megermet janah idatkenna kepentaren si tuhu-tuhu i bas pengajaren e nari.

Labo terjeng iangkaina kerna kegeluhen Kristus ras penyalibenNa, tapi pe banci itandaina kerina rencana kepentaren ilahi si mbages ras luar biasa si lit i bas ia. Aminna pe si iberitakenna e kebodohen iakap doni enda, tapi iakapna kepentaren kap. Arah pengajaren enda kalak enda jadi kalak pentar, janah ngasup mencerna kepentaren si lit ije. Ertina, kalak si pentar ngenca si cocok jadi hakim guna menilai kai kin kepentaren e. Labo kepentaren doni ras penguasa-penguasa doni enda, tapi kepentaren Dibata si terbuni (ay. 6-7). Labo kepentaren doni, tapi kepentaren Dibata. La bali ras kepentaren si banci idatken manusia ibas doni enda, ntah pe ialoken manusia si nggeluh rikutken doni enda, si ikuasai kiniganjangen ukur, hawa nafsu, sura-sura, kesenangen.

Kepentaren enda enggo isikapken Dibata guna kemulianta ope denga doni enda ijadiken (ay. 7). Kepentaren e isikapken Dibata kap. Enggo ndekah itetapkenNa guna mpetangkassa ras mpebetehkenca. Mulai berabad-abad si lewat, mulai kin tangtangna nari seh rasa lalap. Janah enda ibahanNa guna kemulianta, subuk selaku rasul bagepe selaku kalak kristen. Man rasul-rasul, sada kehamaten si mbelin adi ipercayaken guna mpetangkas kepentaren e. Nandangi kalak Kristen, sada hak istimewa ras kehamaten si mbelin, adi kepentaren si mulia enda ipebetehken man bana. Payo, kepentaren Dibata enggo ipetangkas man bana. Kepentaren Dibata si ipetandaken arah Berita Si Meriah, kepentaren ilahi si iajarken arah Berita Si Meriah, nikapken kemulian ras kejuah-juahen si rasa lalap man banta. La lit sada pe penguasa doni enda si nandai ia (ay. 8), subuk kalak si mbelin, si megegeh dingen erkuasa, ntah pe si pentar ras erpemeteh. Mungkin siimaksudken ijenda, pejabat-pejabat Romawi ras pemimpin-pemimpin gereja ras bangsa Jahudi me si terutama imaksudken i jenda. Sebab kalak enda me penguasa doni enda, ntah pe jaman enda paksa sie, si adi ietehna kepentaren surgawi si tuhu-tuhu enda, labo ipakukenna Tuhan si mulia e ku kayu persilang.

Pilatus ras pemimpin-pemimpin Jahudi ngelakoken sie persis tupung Penebusta ipakuken erkiteken hukumen si ibelasken Pilatus ras tuntuten si iserkoken pemimpin-pemimpin Jahudi. Ertina, Jesus Kristus igelari Tuhan si ermulia, janah enda gelar si terlalu mbelin si la banci ibereken man isepe. Janah alasen engkai maka segat ate kalak ernin Yesus, eme erkiteken la itandai kalak Ia. Adi kalak si mpersilangken Ia enggo nandai Ia, ise Ia ras kai jabatenNa, tentuna la ia nggit ndadap Ia ras munuh Ia. Enda me alasen pemindon Yesus man BapaNa gelah ialemiNa dosa kalak enda: O Bapa alemi min dosa kalak enda, sebab la ietehna kai siibahanna (Lukas 23:34). Ertina melala hal si la banci ilakoken manusia adi ietehna kepentaren Dibata i bas pendahin penebusen si luar biasa enda. Ilakokenna enda erkiteken ia pentang ntah pe la erdiate. La ietehna kebenaren, ntah pe la nggit mperdiateken kebenaren.

Kepentaren manusia banci saja sikap terbegi, tapi lenga tentu mabai manusia ku Kristus ras pendahinNa i kayu persilang. Erkiteken sie me Paulus, ibas perikop sebelumna, mengkritik kesukaan kalak Korinti nandangi kepentaren si iajarken manusia. Tapi, labo berarti berita si meriah si ipeseh Paulus la mengandung kepentaren sitik pe. Tapi kepentaren enda terbuni ras rahasia, tapi terbuka man kalak si enggo dewasa kinitekenna (6) (bdk. 1 Kor. 14:20; Ef. 4:13; Pil. 3:15). Kalak si dewasa eme kalak si meteh mbedaken apai simehuli ras si la mehuli. Siteh maka anak-anak kitik pasti namaken kai pe ku babahna, alu la ietehna bahaya ntah lang. Jadi kalak si dewasa siimaksudken Paulus eme kalak si beluh mbedaken kepentaren si rehna ibas Dibata nari ras kepentaren si la rehna ibas Dibata nari.

Adi bage engkai maka penguasa doni enda la ngangkai kepentaren si mulia e (8)? Sebab kepentaren e reh alu erbuni-buni, tapi ipetangkas arah berita simeriah kerna Kristus bagi siiberitaken Paulus. Kepentaren eme sada rahasia si badia, si la banci ieteh alu kepentaren manusia saja, tapi arah pernyataan Dibata ngenca. Erkiteken sie me Kesah Si Badia ngenca ngasup mpeseh enda man manusia. Erkite-kiteken manusia doni enda la merincuh nandangi kai pe si rehna ibas Dibata nari, sebab e ianggap kebodohan, maka manusia la ngasup ngangkai kai pe si rehna ibas Dibata nari.

Alu kata sideban ate Paulus nuduhken uga kin kalak rohani, eme:

1. Bali ras Paulus ras teman-temanna sada dahin, ngajar ras ngerana erpalasken kepentaren ras Kesah Dibata (ayat 6,13).
2. Ngantusi hal-hal rohani, janah menilai kerinana erpalasken kepentaren Dibata, labo penilaian kalak sideban (ayat 14-15).
3. Labo bagi manusia duniawi si la ngaloken kepentaren i bas Kesah Dibata nari, sebab iakapna kebodohen, janah la ngasup ngantusisa (ayat 14).

Intina, kalak si berrohani ngasup ngergaken kepentaren ras kehadiren Kesah Dibata segedang-gedang geluhna.

III. PENGKENAINA

Temata eme ”Ibas Kita Lit Kap Kepentaren Dibata”. Pentar ibas cakap Indonesia ertiken alu berhikmat. Hikmat ibas pustaka si Badia ertina mbiar ras erkemalangen man Tuhan. Emaka nina ibas Kuan-kuanen 9:10-11 nina, “Maka banci kalak jadi pentar la banci lang erkemalangen ia lebe man Tuhan. Adi itandaindu Dibata si Badia e lit kap pengertinndu. Janah kepentaren erbahansa umurndu reh gedangna.”

Arah bahan PJJ ta enda ngajarken man banta maka bas kita kerina enggo kepeken lit ibereken Dibata kepentaren si rehna bas Dibata nari guna ngangkai sura-sura Dibata bas geluhta enda. Tapi kepentaren Dibata enda la banci iantusi alu kepentaren manusia tapi Kesah Si Badia eme ngenca ngasup ngajari kita ngangkaisa. Janah Kepentaren Dibata siituriken ibas bahan PJJ ta enda eme:

1. Ngajar ras ngerana erpalasken kepentaren ras Kesah Dibata.
2. Ngantusi hal-hal rohani, janah menilai kerinana erpalasken kepentaren Dibata, labo penilaian manusia.
3. Labo bagi manusia duniawi si la ngaloken kepentaren i bas Kesah Dibata nari, sebab iakapna kebodohen, janah la ngasup ngantusisa (ayat 14).

Ertina kalak si enggejapken maka bnas ia lit kepentyaren Dibata eme kalak nggeluhken kegeluhenna erpalasken sura-sura Dibata ras erpalasken singena ate Dibata. Janah kai si siilakokenna inilaina arah perspektif dibata labo menurut penilaian manusia. Emaka adi kalak nggejapken maka bas ia lit kepentaren Dibata, teridah nge arah pengerana ras perbahanenna bagepe ibas ia memutusken ras ngaloken keputusen e lalit guna kepentingenna pribadi tapi kerina erpalasken singena ate Dibata ras guna kemulian Dibata.

Emaka adi peserta sidang-sidang gerejanta GBKP, khususna peserta Sidang Majelis sinode enda tuhu-tuhu nggejapken maka bas ia lit kepentaren si rehna bas Dibata nari, pasti perdalanen Sidang Msjelis Sinode e pe erdalan kerina alu mehuli janah proses perdalanen persidangen e pe pasti sikap ras teridah maka arah pengerana ras perbahanen selama persidangen e pe erdalan kerina alu teratur ras keputusen kai pe siiputusken pasti maba kemalemen ate ras kiniulin man jemaat GBKP secara sinodal dingen ermulia gelar Tuhan erkiteken kerina siilakoken selama persidangen e, ilakoken guna kemulian Tuhan.

Ogen : Mazmur 34:12         

Tema : Bulatken Ukur Erbahan Perdamen

(Sasaran pelayanan GBKP tahun 2025 poin III: Konflik Lokal Di Selesaikan Secara Lokal)

I. KATA PENARUH

Situhuna secara kiniteken kalak Kristen, lanai bo lit kalak si panjang punjuten erkiteken entah pe la siperkuanen. Erkiteken ibas iman Kristen dua ngenca intina eme, Engkelengi Tuhan Dibata ras Engkelengi Manusia.

1. Sepuluh perintah Dibata pe dua ngenca intina eme, 1-4 engkelengi Tuhan Dibata, 5-10 engkelengi manusia.
2. Sibegiken pe khotbah dari awal sampai akhir, dua ngenca intina eme, engkelengi Tuhan Dibata ras engkelengi manusia
3. Si oge pe mulai Kejadian nari seh Ketangkasen, dua ngenca intina eme, engkelengi Tuhan Dibata ras engkelengi manusia.
4. Salib pe megati iertiken alu dua hal eme, yang Vertikal mengasihi Tuhan Allah dan Horizontal mengasihi manusia.

Alu kata sideban, arah inti iman kristen enda eme Engkelengi Tuhan Dibata ras engkelengi manusia, lanai aturna mesera siakap erdama sapih-sapih kita. Emaka arah bahan PJJ ta enda erlajar kita uga kita alu bulat ukurta erban perdamen.

II. PEBAGESI PENGANGKAAN KERNA TEKS

Bahan PJJ ta enda eme pengajaren Daud kerna nggeluh erkemalangen man Dibata. Daud, ibas bagin terakhir ibas masmur enda, berusaha ngajari anak-anak. Aminna pe ia sekalak tentera janah nggo itangkuhken jadi raja, labo iakapna dahin ngajar enda dahin si rendah. Aminna pe genduari takalna dem alu perbeben ras tanna sibuk ras erbage-bage dahin, banci ia nggit mereken pusuh ras waktuna guna mereken nasehat si mehuli man anak muda, erpalasken pengalamenna sendiri. Ija ibas 1 Samuel 21:10-15, ijelasken maka Saul ersura-sura munuh ia emaka Daud harus kiam ku Gat. Amin bage gia, kehadirenna i Gat pe iteh Raja Gat, eme Akis (gelarna situhuna) ntah pe Abimelek (gelarna, si ertina bapa raja). Perbeben Daud enggo lengkap: kiam i bas Saul nari si ersura-sura munuh ia, sirang ras temanna si ndeher ras Jonatan, ras jumpa ras Akis si ernembeh ate man Daud erkiteken munuh Goliat. Emaka labo heran adi Daud merasa mbiar (5), mela (6), tertindas ras sesak nafas (7). Terjebak iakapna, janah la lit ise pe si banci iandalkenna, seakatan Tuhan Dibatana. Emaka erlebuh Daud man Dibata (7).

Perdiateken uga Daud nggejapken kiniulin Dibata i bas kiniseranna: “Kudarami Tuhan, ialoiNa aku, janah IpulahiNa aku…” (5); "...erlebuhlah, maka ibegiken TUHAN; IselamatkenNa..." (7); "Malekat TUHAN erkemah... janah iselamatkenna" (8). Lebih mbages igejapken Daud keleng ate Dibata i tengah-tengah kiniseranna. Igejapna maka Dibata ndeher ras kalak si erceda ate janah iselamatkenna kalak si erceda ate (19). Emaka asangken mengkritik Dibata kerna kiniseran ibas geluhna, tapi Daud muji Dibata (2-3), janah ngajuk kerina bangsa e guna mpermuliaken gelarNa (4). Kenca nggejapken kiniulin Dibata, pusuh Daud la saja dem alu pengataken bujur ras puji-pujin man Dibata, tapi pe iresponna alu mbiar man Tuhan (10a, 10b, 12), si nuduhken kepatuhenna man Dibatana.

Erkiteken sie si iarapkenna i bas anak-anakna nari eme: “Begikenlah aku, ulanai main-main, tadingkenlah mainanndu, janah begikenlah kai si man katankenku man bandu. Janah ula terjeng megiken aku saja, tapi rehlah kam ngikutken aku.” Daud ngajarken: erkemalangen man Dibata, si mencakup kerina kewajiben agama. Daud sekalak musisi, negarawan, ras tentera si terkenal. Tapi labo ikatakenna man anak-anakna, “Kuajari kam main kulcapi, ntah ncikep pedang ras lembing, ntah nembak anak panah, bage pe la kuajari kam pernyataan kerna kebijaken negara.” Malahen nina, “Kuajarken man bandu uga carana erkemalangen man TUHAN!” si e ulin asangken kerina seni ras ilmu pengetahuan, ulin asangken persembahen tutungen ras persembahen si deban.

Ibas Masmur enda, Daud nuriken piga-piga hal si jadi palas ras kunci guna menikmati kegeluhen si bakal mpegegehi keriahen ras kepuasen, bagi si tersena i teruh enda : [1] Erkemalangenlah man Tuhan (ayat 8, 10, 12); [2] Erlebuh man Dibata (ayat 5,11); ras [3] Ertekad nggeluh ibas kebenaren (ayat 14, 15). Kerina enda mabai kalak si bujur ku bas perlindungen, kecukupen, kecukupen kebutuhen, ras jabapen pertoton. Tapi enda kerina labo berarti kerina banci erdalan alu mehuli. Pilihen kalak si benar ngataken “Lang” nandangi si jahat ras “Ue” nandangi si mehuli (ayat 14, 15) labo lalap erbahanca geluhna lancar ras beruntung, tapi rusur maba erbage-bage rintangan ras kiniseran man bana (ayat 20a).

Emaka nina Daud guna ndatken kemalamen ate e, si arus silakokene eme:

1. Ula belasken kata-kata jahat. Kita arus erlajar ngkuasai dilahta, janah metenget nandangi kai si ibelasken kita, gelah ula pernah kita ngataken si la payo, si erbahanca mela Dibata ras mpeturah anggapen si la mehuli i bas temanta manusia: ”Jagalah dilahndu i bas cakap si la mehuli, cakap si la mehuli, ras cakap si la mehuli. Sedemikian besar pengaruh persoalen enda ibas agama maka, adi sekalak jelma la salah ibas ngerana, maka ia me kalak si sempurna. Janah hampir ibadah agama la banci terjadi adi la lit kebenaren enda, emaka kalak si la menahan dilahna, sia-sia me ibadahna.
2. Ula erbual. Arus bujur ras bujur ibas kerina si ibelasken kita, ula erdua-dua. Rananta arus jadi indikasi perukurenta, janah biberta arus ijaga gelah ula nipu Dibata ntah pe manusia.
3. Tadingkenlah kejahaten,. Kita arus nadingken kerina dosa-dosanta, janah ertekad gelah ulanai lit hubungenta ras dosa-dosanta e. Kita arus ndauh ibas kejahaten nari, ndauh ibas kerina perbahanen si jahat ras si ngelakoken kejahaten. Kita arus nilahken dosa-dosa si enggo ilakoken kalak si deban ras dosa-dosa si enggo sipediat kita ngelakokenca.
4. Lakokenlah kai simehuli Ibas doni enda. Labo cukup kita hanya la sakit hati, kita pe harus berusaha gelah erguna ras nggeluh lit tujunna. Kita la terjeng mpedauh kejahaten, tapi pe arus silakoken si mehuli, si mehuli man dirinta, ras terlebih man tendinta jine. Perlu kita nggeluh mehuli ras tendinta sendiri, siperlengkapi alu erta-erta si mehuli, ras sibahan cocok guna kegeluhen i doni si deban. Janah, sue ras kengasupen ras kesempaten si lit bas kita, kita pe arus erbahan si mehuli man kalak si deban.
5. Bulatkenlah ukurndu erbahan perdamen. Erkiteken la lit si lebih bertentangan ras kekelengen si la erngadi-ngadi (si jadi inti undang-undang ras berita si meriah, lias ate ras kemulian) asangken perpecahen ras perjengilen, si erbahanca turah kerusuhen ras tep-tep perbahanen si jahat, emaka arus sidarami perdamen ras sidalankenca.

Arah bahan PJJ ta enda, salah sada si erbanca gedang umurta dingen sinanami keriahen ras kesangapen eme nggelo erban perdamen. Kita arus ncidahken kecenderungen guna berperilaku dame, erlajar hal-hal si maba kedamen, ula ngelakoken hal-hal si ncedai kedamen ras ula ngelakoken kejahatan. Adi dame tempa-tempa lanai lit bas kita, maka arus siusahaken ndaramisa. Usahakenlah nggeluh erdame ras kerina jelma, ula setengah-setengah, ula mbiar rugi, guna njagai ras pemulihken perdamen. Marilah nggit kita menyangkal dirinta asa bancina, subuk secara kehormaten bage pe kepentingen dirinta, guna kemalemen ate.

Engkai maka kalak si tutus ibas Tuhan (ngelakoken perdamen) malem atena nggeluh dingen gedang umurna? Erkiteken ibas ayat 16-22 jelas ituriken maka:

1. Kalak situtus iperdiateken Tuhan.
2. Adi erlebuh ia ialoi Tuhan.
3. Erlebuh kalak bujur man Tuhan ialoi Tuhan ia.
4. IpulahiNa ia ibas kesusahenna.
5. Tuhan nemani kalak si lanai piher ukurna,
6. IsampatiNa kalak si enggo bene pengarapenna
7. Aminna gia kalak bujur mbue ngenanami kiniseran, tapi ipulahi Tuhan ia ibas kerinana nari.
8. Badanna tetap ikawali Tuhan, emaka lalit sada pe tulanna si penggel
9. Kalak si ernembeh ate man kalak bujur bujur la banci la iukum.
10. Tuhan si mulahi bangsaNa, kalak si ndahi Ia mindo penampat, tentu ikawalina

III. KATA PENARUH

Temata eme, ”Bulat Ukur Erbahan Perdamen”. Bulat ukur ertina sepenuh hati. Dalam KBBI sepenuh hati artinya penuh kesungguhan, dedikasi, dan keikhlasan atau tidak berpura-pura. Perdamen berasal dari kata dame. Dame dalam bahasa Indonesia damai yang artinya dalam KBBI adalah tidak ada perang; tidak ada kerusuhan; aman, tenteram; tenang, keadaan tidak bermusuhan; rukun. Alu kata sideban tema enda ngajarken man banta makaselaku kalak si erkiniteken, kita harus sungguh, sungguh mau melaksanakan kerukunan, tidak bermusuhan, damai.

Arah bahan PJJ ta enda ituriken maka, salah sada cara gelah gedang umurta ras malem ateta nggeluh eme arah nggeluh erban perdamen erkiteken la lit si lebih bertentangan ras kekelengen si la erngadi-ngadi asangken perpecahen ras perjengilen, si erbahanca turah kerusuhen ras tep-tep perbahanen si jahat.

Emaka selaku kalak si erkiniteken, marilah kita kerina tetap berusaha mencipatakan perdamen sapih-sapih kita. Konflik-konflik si lit bas jabuta, sektorta, runggunta ras ijapa kita tading, siusahakenlah maba perdamen, gelah malem ateta nggeluh dingen Dibata rate ngena man banta dingen sidat pasu-pasuNa.

Pdt. Jaya Abadi Tarigan-Runggun Bekasi