Nats         : 1 Korinti 14 : 33, 40

Tema      : LAKOKEN ALU METUNGGUNG DINGEN RATUR

Kota Korinti eme kota pelabuhen si maju ibas jamanna, erkiteken si e kota enda melala ipengaruhi oleh kebudayaan, cara nggeluh (1 Kor. 5 – 8) bagepe kiniteken ibas erbage-bage bangsa (1 Kor. 10) si cukup melala ertentangen ras sura-sura Dibata. Emaka arah suratna sipemena man perpulungen Korinti enda, Paulus mpersingetti perpulungen dingen mereken pengertin si payo nandangi perpulungen Tuhan kerna kuga kin arusna anak-anak Dibata erkiniteken dingen ndalani kegeluhenna alu benar, mehuli ras badia.

Selaku kota maju, Korinti la saja iiani erbage-bage suku ras lapisen masyarakat (kota majemuk) tapi perpulungen Korinti pe perpulungen si tuhu-tuhu melala ngaloken pasu-pasu ibas Dibata nari (2 Kor. 8 : 7 “Kam sampur kap ibas kai pe : ibas kiniteken, ibas ngerana, ibas pemeteh, ibas ketutusen ibas kai-kai pe,…..”). La saja pasu-pasu ibas bentuk materi tapi pe pasu-pasu ibas erbage-bage bentuk kengasupen ras talenta si rehna ibas Dibata nari/ pemere Kesah si Badia (1 Kor. 12 : 1 – 11 : Kesah mereken berita si mbages pengertinna ntah pe s idem pemeteh, Kesah e ka nge si mereken kiniteken, kengasupen mpepalem kalak si pinakiten, kengasupen ngelakoken perbahanen si ngelebihi asa kuasa manusia, kengasupen ernubuat, kengasupen ngerana ibas erbage-bage cakap, kengasupen nuriken antusen cakap Kesah e, rsd). Kerina pemere-pemere e ibereken rikutken sura-sura Dibata man anak-anakna (1 Kor. 12 : 11b) segelah sikap guna ndahiken dahin Dibata eme majekken kula ni Kristus (1 Kor. 12 : 12 – 13).

Tapi kinata kegeluhen perpulungen Korinti la sue ras peraten Dibata, pemere-pemere Dibata sinialokenna e erbahanca terjadi kekacauan ibas perpulungen khususna ibas kebaktin-kebaktinna. Penggunaan pemere-pemere Kesah e erbahanca terjadi persaingen si la sehat erkiteken ipakeken guna kesenangen diri ras menyombongken diri. Emaka ibas 1 Kor. 14 : 16 – 40 enda Paulus mpersingetti kuga kin arusna perpulungen e. Arusna min :

• Kalak si ngaloken pemere Kesah e geluhna terpusat ku Dibata labo ku dirina. Labo ia asyik guna dirina saja tanpa ngukurken keberadaan kalak si deban
• Kalak si ngaloken pemere Kesah e nggit i pimpin ras i tegu Kesah segelah tersehi sura-sura Dibata, nggit siergan ras saling ngelengkapi seh maka tercipta kiniraturen.
• Kalak siidemi Kesah si Badia arusna nggeluh ibas kekelengen, eme mengutamaken kalak si deban asangken dirina sebab eme hakikat kekelengen

Temanta : Lakokenlah Alu Metunggung dingen Ratur ngingetken ras ngajuk kita selaku perpulungen ni Tuhan Yesus segelah ibas kinierbagen kegeluhenta; subuk kerna pemere Dibata, gegeh ras kengasupen bagepe kinierbagen kengasupen ras talentata banci min tetap sipakeken alu mehuli guna kiniraturen kegeluhen persadanta itengah-tengah gereja. Alu bage sikap dingen mehuli perdalanen pelayanen gerejanta dingen itengah-tengah perpulungenta pe tercipta Susana si dame ras dem kemalemen ate. Arus min maka sicidahken maka Kristus eme takal gerejanta s idem kiniraturen sebab Dibata si isembah kita epe Dibata s idem kedisplinen ras kiniraturen. Enda banci siidah menaken kin ndube Dibata nepa ras njadiken doni enda ras kerina isina alu dem kiniraturen.

Kai si arus silakoken segelah kerina banci silakoken alu metunggung ras ratur ?

1. Litna kesadaren maka kerina kita lit kelebihen ras kekurangen sinibereken Dibata. Ngasup kita nandai dirinta ras ngaloken (kelebihen ras kekurangen) dirinta alu bage ngasup ka kita ngaloken temanta ibas kelebihen ras kekurangenna.
2. Ngasup kita siergan sada ras sidebanna itengah-tengah kinierbagenta. Mbicara lit pe kekurangen temanta sipersingetti alu dem keleng ate. Alu bage kinierbagenta e jadi kebayaken ras gegeh si saling melengkapi ibas pelayanenta (erbahanca metunggung pelayanenta).
3. Arus tetap siinget maka amin pe erbage-bage kita tapi sada kula. Sada ringring labo ngasup adi la itopang ring-ring si deban. Dingen tujunta pe tetap sada eme majekken kula Kristus.
4. Masing-masing siangkai min kai si jadi tugasta dingen sidahiken min e alu dem tanggungjawab alu palas malang ras mehamat man Tuhan
5. Si dalanken min kerina sue ras aturen nggeluh selaku gereja secara pribadi bagepe gereja secara organisasi (lit aturenta erpalasken : Pustaka Si Badia, Tata Gereja, GBP, Keputusen Konpen ras SKMS, Keputusen Sidang Majelis Klasis, Keputusen Sidang Majelis Runggun, rsd).

 Pdt. Elba Pranata Barus-Runggun Bandung Timur

Nats         : Kuan-Kuanen 7 : 1 - 5

Tema      : Kepentaren Jadi Teman

Kitab Kuan-Kuanen enda isina eme pedah-pedah, pertenget, persinget bage pe pengajaren kerna kuga ndalani kegeluhen si payo ras benar itengah-tengah erbage-bage godaan, cara geluh ntah pe erbage-bage situasi si terjadi ibas kegeluhen enda. Kegeluhen enda banci idalani alu payo ras benar di kune lit kepentaren ibas kita, janah kepantaren situhu-tuhu e si datken ibas Dibata nari.

Pengogenta enda erkawiten ras Pasal 6 bagepe pasal 7 : 6 – 27, eme pedah sekalak bapa nandangi anakna singuda segelah la terpengaruh ku bas pergaulen si la mehuli si mabai kecedan geluh. Secara khusus memang isingetken segelah ola erlua-lua bagepe ola tergoda nandangi rayon diberu perlua-lua si mabai ku bas kebenen. Gendekna banci sikataken maka penulis mpersingetti segelah tetap njagai kebadian kegeluhen selaku kalak sitek man Dibata. Enda sada hal si sangat penting iakap kami ibas jamanta genduari enda pe, ija melala kel genduari pergaulen si encedaken kubas kegeluhen. Kebadian lanai niakap sada hal si meherga si perlu ijaga ras iperjuangken genduari enda. Si man kemelanken e ka ianggap genduari sada prestasi ntah pe prestise, khususna ibas anak-anak muda gundari. Pergaulen ras cara nggeluh si la mehuli jadi kebanggan “si ipamerken tanpa ras malu”, sementara si tetap nggeluh ibas kebenaren ras kebadian ianggap “ketadingen jaman” ras la gaul (la ngikuti perkembangen jaman). Emaka labo ateta mamang maka menjamur kel genduari pinakit-pinakit sosial siencedaken ibas kegeluhenta, melala anak perana singuda-nguda sienggo arus “i oratken ras ipejabu” erkiteken enggo lalar perdalanna, rumah tangga pe hancur erkiteken labo ipalasi ku bas ate keleng ras kiniteken man Dibata, kejahaten pe reh buena, dingen la sitik orang tua erbebe kerna anak-anak sienggo salah pergaulen ras perdalan.

Arah bahan PJJnta sekalenda iajuk ras ipersingetti kita mulihi kerina (khususna orang tua) kuga kita ertanggungjawab nuanken kiniteken ras kata Dibata man anak-anakta segelah ia mbelin jadi kalak si malang man Tuhan. Kalak si malang man Tuhan tentu lit kepentaren ibas ia guna nulak cara nggeluh ras pergaulen si la mehuli, lit pertimbangenna si mbages erpalasken sura-sura Dibata ibas ia menyikapi hal-hal sijadi ibas kegeluhenna bagepe muat keputusen, bagepe lit daya tahan (karakter) si mehuli ras paguh ibas ngalaken erbage perbeben ras pengajuk sijahat erkiteken kinitekenna man Dibata seh maka la ia terpengaruh kubas hal-hal si la ngena ate Dibata. Arus menda kita pe terus erlajar kerna kegeluhen enda, dingen nggit tetap ersukuten man Dibata ibas kita ndalanken tanggungjawabta nandangi anak-anakta e. Alu bage anak-anakta e jadi anak-anak sitetap nggeluh ibas kepentaren, tetap ia jadi rudang-rudang si merim itengah jabunta, gereja bagepe masyarakat.

Temanta : Kepentaren Jadi Teman; teman ibas kita ndalani kerina situasi kegeluhen enda bagepe teman ibas kita ngajarken ras ndidik anak-anakta (ay. 4-5). Janah kepentaren e banci lit bas kita dingen jadi temanta dikune :

• 1 : kita tetap nginget perentah-perentah Dibata man banta. Perentah Dibata e jadi patron man banta ibas ndalani kegeluhen enda, emaka ketutusen ras kesetiannta ngoge Kata Dibata banci mpelimbarui kiniteken ras kegeluhenta. Bagepe selaku orang tua ertanggungjawab kita ibas nehken pengajaren kerna perentah Dibata man anak-anakta. Kuga banci siajarken man anakta adi kita pe kurang pemeteh ras pengertinta kerna Kata Dibata e, labo kita merincuh ngoge Pustaka pe.
• 2 : Kita tetap ngelakoken perentah/ pedah Dibata e. Kata Dibata e la banci terjeng iinget-inget ntah pe ieteh saja tapi arus idalanken sebab ndalanken Kata Dibata e jadi latihen pertendin man banta. Alu ndalanken ntah pe mem-praktekken kata Dibata em tandana kinitekenta nggeluh,janah ije ka me kita nehken usihen man anak-anakta segelah anakta epe jadi pelaku Firman ibas kegeluhenna.

Kalak sindalanken perentah Dibata mabai bana metenget (bersikap berhati-hati/ mawas diri) ibas ndalani kegeluhenna (1 Pet. 5 : 8).

• 3 : nginget lalap (Ind. “tabatkanlah semua itu pada jarimu) ertina kata Dibata e lalap jadi persinget guna ngingetken kita kerna tanggungjawabta. Kata Dibata e jadi simeherga ibas kegeluhenta si mabai kita kubas kemulian Dibata.

Suratkenlah ibas pusuhndu (Ind. : “tulislah itu pada loh hatimu”) ertina maka kata Dibata e tetap ngiani dingen nggeluh ibas pusuhta alu bage pusuh peraten ras perukurenta ikuasai sura-sura Dibata (Heber 8 : 10). Adi pusuhta ikuasai sura-sura Tuhan enggo tentu maka kerina kegeluhenta (pengerana ras perbahanennta) bagi sura-suraNa sebab pusuh eme pusat kegeluhen (Mat. 15 : 18 – 19).

 Pdt. Elba Pranata Barus-Runggun Bandung Timur

Nats  : Heber 5 : 11 - 14

Tema : Kesempaten Jadi Guru

Surat Heber enda itujuken man perpulungen kalak Kristen si sangana ngenanami kiniseran si mesangat paksa e alu tujun guna mpegegehi kinitekenna man Dibata. Perpulungen enda eme perpulungen si enggo ndekah jadi kalak Kristen, tapi kinitekenna man Dibata lenga rurat mbages (tidak bertumbuh) dingen biakna bagi danak-danak denga. Biasana kalak si la mbages kinitekenna dingen biakna bagi danak-danak si mesunah kel iombang-ambingken pengajaren si papak, la tetap ukur dingen megati mesunah ngobah ukurna erkiteken perbeben ntah si la bagi ukurna si terjadi. Ibas situasi enda me penulis surat Heber enda mpegegehi kiniteken perpulungen segelah ula talu ibas situasi perbeben ntah pe kiniseran sisangana ialamina.

Khususna ibas natsta enda isehken maka arusna perpulungen enda enggo min jadi perpulungen si dewasa ibas kinitekenna man Dibata bagepe pengangkan ras pengertinna kerna kebenaren kata Dibata; enggo min banci jadi guru man kalak sideban tapi kinatana maka perpulungen e biakna desken danak-danak denga. Melala denga ate penulis isehkenna man pepulungen tapi mesera iakapna mpesehsa man perpulungen e erkiteken :

1. Pemahamen kerna kiniteken (iman Kristen) simbages ras utuh e la banci idatken alu cepat/ instan tapi arus arah proses (hubungen si mehuli ras Dibata, kininggiten guna erlajar kerna Kata Dibata bagepe arah pengalamen geluh sitep-tep wari)
2. Perpulungen e melet ibas ngangkai, lambat ibas rukur dingen mesunah lupa kerna pengajaren e.

Tapi amin bagepe penulis surat Heber enda tetap saber ras megenggeng ibas nehken pengajaren bagepe pengertin man peperpulungen. Ertanggungjawab kel iakapna ia kerna kiniteken ras kegeluhen perpulungen Tuhan e. Isehkenna pengajaren sipayo ras benar segelah perpulungen e jadi perpulungen si dewasa ibas kiniteken man Dibata.

Bage ka me kinata kegeluhenta perpulungen Tuhan ibas paksa genduari. Enterem sienggo ndekah jadi kalak Kristen si “nina” tek man Dibata tapi pertumbuhen rohani/ kinitekenna la teridah. Mesunah monce ukurna dikune reh perbeben ntah si la bagi ukur, mesunah denga terpengaruh kubas pengajaren sipapak bagepe cara geluh si la sentudu ras peraten Dibata, pergelut, la mediate nandangi dahin-dahin kiniteken/ gereja, ndekah melayani tapi butuh denga pengakun bas manusia nari, la ertanggungjawab (hakna ngenca ingetna); e kerina me biak si medanak denga. Ije teridah maka lenga dewasa ibas kiniteken. Ula lebe arapken erbuah, uratna ras perturahna saja lenga ibas kiniteken si benar ras payo eme ibas Kristus bagepe kataNa (band. Kolose 2 : 6 – 7). Oratna kin min enggo banci jadi pengajar nandangi kalak si deban. Hal enda banci saja erkiteken kurangna ketutusennta ibas nehken pengajaren (secara gereja bagepe jabu/ keluarga) bagepe kinilanggitenta guna ngaloken pengajaren situhu-tuhu ras benar kerna Dibata. Riahen siakap rusur megiken pengajaren “sientabeh ibas cuping” asangken pengajaren si aminpe “meser” dingen la entabeh guna ibegiken tapi mabai kegeluhen man banta.

La banci sipungkiri maka Ingan si paling penting ibas membentuk kiniteken si dewasa enda eme jabu. Orang tua (si dewasa ibas kiniteken) enggo pasti lit tanggungjawabna ibas jadi guru (guru = digugu dan di tiru) nandangi anak-anak itengah jabu. Ibabaina anak-anak e erkemalangen man Dibata dingen tutus ibas kegiaten gereja, iajarken ras imamahkenna Kata Dibata e ibas kegeluhen anak, icidahkenna biak-biak ras usihen si mehuli nandangi anak-anak itengah jabu (Ul. 6 : 4 -9). Saber dingen megenggeng kita ibas nehken pengajaren man anak jabunta, janah ibabo sie kerina tetap kita mindo pengajari Kesah Si Badia. Hal enda arus jadi perhatianta ras-ras selaku orang tua ras gereja, terlebih ibas ngidah tantangen buena pengajaren-pengajaren sipapak bagepe cara-cara nggeluh si ertentangen orat nggeluh selaku kalak Kristen bagepe selaku kalak Karo. Alu bage anak-anakta e jadi anak-anak si dewasa ibas kiniteken dingen ibas paksana pepagi ia ka jadi guru/ pengajar nandangi kesusurenna.

Kuga kin perpulungen sienggo dewasa?

• Litna pengertin ras pengangkan si benar kerna Dibata ras kataNa seh maka mbages ras payo penandaina kerna Dibata siisembahna e (Ep. 4 : 13). Alu bage amin pe melala tantangen ras perbeben, kegeluhenta la mesunah iombang-ambingken pengajaren si papak (Ep. 4 : 14 - 15). Emaka kiniteken si dewasa labo terjeng tek man Dibata tapi pe pang “mempercayaken” kegeluhenna ibas tan Dibata.
• Nggeluh bas ia kerna kata Dibata. Labo terjeng pengangkan ras pemetehna kerna kata Dibata saja si mbages tapi pe ngasup ia ndalanken kata Dibata e ibas kegeluhenna. (Jakup 2 : 17 “Bagepe kerna kiniteken. Adi kiniteken labo sue rikut ras perbahanen, kiniteken sibage mate kap”). Kalak si bage enggo ngasup guna ngajar subuk arah pengerana bagepe perbahanen (usihen).
• Ngasup man nakan keras (ay. 12b). Ertina ngasup ia ngaloken kebenaren situhu-tuhu dingen ngasup ia ngalaken situasi siugapana pe sebab e kerina erbahanca ia megegeh ras paguh (1 Tim. 4 : 6 – 10).
• Ietehna apai si benar ras si salah (ay. 13) ntah pe ietehna apai si bujur apai si jahat (ay. 14). La ia mesunah terpengaruh ntah pe terkontaminasi kubas pengajaren bagepe cara nggeluh si papak.
• Ietehna kai tanggungjawab ras kewajibenna selaku kalak sierkiniteken subuk itengah jabu bagepe ibas perdatan itengah-tengah gereja.
• Lanai ia nggeluh guna dirina saja tapi enggo ngasup rukur bagepe berbagi man kalak sideban. Ngasup ngaloken kalak si deban, la ngasup nggeluh si sada (dewasa ibas kiniteken berarti reh ngasupna nggeluh ibas persadan labo reh ngasupna sirang ras kalak si deban).

Pdt. Elba Pranata Barus

GBKP Rg. Bandung Timur