SUPLEMEN PEKAN DOA GBKP TAHUN 2025, HARI KE 6
Invocatio :
“ Erdahinlah guna kiniulin kuta-kuta ku ja kam enggo Kubuang jadi tabanen. Ertotolah guna keperlun kuta e sabap adi sikap ia kam pe ikut sikap.” (Jer.29.7)
Kotbah :
1 TIMOTIUS 2.1-7
Tema :
PERTOTON GUNA KERINA MANUSIA
A. BENA KATA
Paulus nulisken surat penggembalaan enda man Timotius guna mperlengkapi ia ibas ndahiken dahin pelayanen tengah-tengah jemaat Epesus. Uga arusna kegeluhen sekalak suruh-suruhen Tuhan. Itegasken Paulus pe man Timotius pentingkal mperdiateken pengajaren si benar ras sehat man perpulungen gelah ula bengket pengajaran si papak si erbahanca perpulungen lanai nggeluh bagi singena ate Dibata. Bage pe ibas surat enda Paulus melala mereken bimbingen ras petunjuk uga sekalak Timotius singuda denga iperlengkapi ibas mpermakani perpulungen.
Ibas nats khutbah ibas wari ntah pe berngi pe IX ken enda, salah sada dahin siperlu iperdiateken Timotius eme kerna ertoto. Ertoto labo kerna pribadina saja ntah perpulungen saja tapi pe penting notoken kerina manusia. Engkai maka kita isuruh notoken kerina manusia, tentu enda lit tujun ras maksudna.
B. PENJELASEN TEKS
1. Perlebe kukataken gelah isehkenndu sapaat, pemindon, pertoton ras pengataken bujur man Dibata guna kerina manusia. Ise kin simaksudken Paulus ijenda kerina manusia. Tentu labo ibatasi ise manusiana ntah manusia si tandai kita saja, kerina manusia ija pa pe ringan, la pe si tandai. Bagi genduari misalna litna konflik bangsa umpana antara Israel ras Palestia, antara Rusia ras Ukraina ras seterusna tentu perlu kal sitotoken gelah peperangen enda ngadi. Sabab sieteh maka erkiteken perang enda melala kal si jadi korban banci jadi si labo denga iangkaina kai pe bagi anak-anak si kitik denga. Ntah lit bencana alam, kebakaren ras peristiwa-peristiwa sideban sigejapken maka perlu kal campur tan ras penampat Dibata emaka ertoto kita.
Bage pe Timotius idilo ertoto secara khusus guna raja-raja ras kerina si erkuasa. Engkai maka perlu sitotoken raja-raja ras kalak sierkuasa, eme gelah raja-raja ras kalak si erkuasa ipakekenna jabaten ntah kuasa si lit bas ia si situhuna ialokenna bas Dibata nari guna melindungi rayatna, guna perehken kai simaba simehuli man rayat si pimpinna. Alu bage kalak si nterem termasuk pe kalak Kristen gelah banci nggeluh senang dingen dame, erkemalangen man Dibata alu lagu langkah si payo.
2. Enda me si mehuli dingen si ngena ate Dibata, Si Ngkelini kita, si ersura-sura gelah kerina manusia selamat dingen meteh kai si tuhu-tuhu. Ijenda teridah uga kin situhuna sura-sura Dibata nandangi kerina manusia eme gelah kerina selamat, la lit si bene tapi ngaloken perkuah ate Dibata si sehkenNa ibas Jesus Kristus.
Bage pe ertoto kita gelah kerina manusia, raja-raja ras penguasa meteh kerna si tuhu-tuhu. Kai kin situhu-tuhu ibas konteks enda eme nandai Dibata si tuhu-tuhu. Sabap sada ngenca Dibata janah sada ka ngenca kelang-kelang si mpersadaken Dibata ras manusia, e me manusia Jesus Kristus. Labo lit dalan manusia nandani Dibata situhu-tuhu e seakatan arah Kristus ngenca. Sabab Kristus me gambar Dibata si la teridah. IA me si isuruh Dibata ku doni enda lako mpetandaken DiriNa kempak manusia, eme Dibata si ersura-sura gelah kerina manusia selamat.
3. Jesus Kristus e enggo ngasamken kesahNa guna nebusi kerina manusia i bas dosa-dosana nari. Sekali nari ijenda itegasken maka kematen Kristus labo guna bangsa tertentu, guna piga-piga manusia saja tapi jelas guna nebusi kerina manusia i bas dosa-dosa nari. Enda jadi sada bukti maka i bas paksa si enggo itetapken Dibata, Ia ersura-sura gelah kerina manusia iselamatken.
Janah erkiteken si enda me maka aku jadi rasul dingen guru nandangi bangsa si labo kalak Jahudi, guna meritaken kerna kiniteken man Jesus Kristus. Si kukataken enda tuhu nge, labo aku erbual. Gejapken Paulus kal maka enda sada tanggungjawab simberat guna banci mpeseh man kerina manusia gelah erkiniteken man Kristus. Sura-sura Dibata gelah kerina manusia selamat irespon Paulus al uterus erdahin erBSM.
4. Ibas nats invo nina tole, Erdahinlah guna kiniulin kuta-kuta ku ja kam enggo Kubuang jadi tabanen. Ertotolah guna keperlun kuta e sabap adi sikap ia kam pe ikut sikap. Kalak si tek man Tuhan idilo gelah ija pa pe maba kiniulin arah pendahin ras perbahanenna. Bage pe ertoto guna keperlun kuta inganta tading sabab adi mehuli kuta e maka kam pe ikut ngenanami simehuli e, janah kalak si tek idilo berperan aktif guna mewujudken tercipta simehuli ibas inganta tading.
C. PENGKENAINA
Kai banci sirenungken arah firman Tuhan enda:
1. Ertoto Guna Kerina Manusia (tema)
Bagi engga ndai isingetken arah datas selain doa untuk pribadi, untuk keluarga, untuk jemaatta, firman Tuhan negasken man banta maka kita perlu notoken kerina manusia. Sitotoken kerina manusia si la si tandai bas kerina belahan doni enda, sidat kita berita si mungkin sangana mengalami peperangen gelah ngadi perang dingen terjadi damai. Ntah si sangana mengalami musibah, bencana alam, kebakaren ras si debanna gelah Dibata erdahin mereken penampat man kerina manusia.
Tambah si e la banci kita lupa notoken pemerintah ntah kalak si erkuasa khususna bas tengah-tengah bangsa ras negaranta, tujunna gelah pemerintahta erngena ate man kebujuren, erbahan simehuli man kerina rayat si iteruh kuasana. Igejapkenna maka ia suruh-suruhen Dibata guna perehken simehuli man kerina rayatna. Alu bage kita selaku anak-anak Tuhan banci nggeluh beribadah dingen ngelakoken simehuli bas tengah-tengah kegeluhenta.
Genduari siidah sada fakta maka mesera denga kal kita ndatken ijin guna membangun gereja bage ijin guna beribadah, emaka teruslah kita tutus notokenca gelah iubah Tuhan ukur pemerintahta jadi mediate man kita kalak sitek jenari mereken dalan man banta gelah banci kita ersembah man Tuhan alu mehuli.
2. Ibas kita ertoto nandangi kerina manusia hal si paling penting sitotoken eme gelah kerina manusia nandai Dibata si tuhu-tuhu eme Dibata si enggo nuruh AnakNa Jesus Kristus jadi kelang-kelang gelah arah Kristus kerina manusia selamat. Kristus enggo mate guna nebusi kerina manusia gelah arah kematenNa manusia si tek ndatken keterkelinen ibas Dibata nari. E maka guna si e sitotoken kalak perBerita Si Meriah ibas ia ndahiken tugas enda. Janah kita pe tentuna la ka hanya ertoto tapi uga ka kita jadi saksi BSM man kalak si deban.
3. Ora Et Labora. Tentu labo ertoto saja tapi pertoton arus ka iikuti alu perbahanen. Bagi nina ndai bas nats invocationta, erdahinlah guna kiniulin kuta ija kam tading bage notokenca. Jadi ertoto ras erdahin dua hal si labo terpesirang. Labo ertoto saja tapi erdahin guna kiniulin kalak si deban. Labo erdahin saja tapi pe ertoto guna kalak si deban gelah nggejapken kiniulin Dibata.
D. PENUTUP
Alu bage dage bas wari/berngi IX ken enda, ngingetken kita maka selain doa peribadi, doa untuk keluarga, perpulungen ula kita lupa notoken kerina manusia sabab Dibata ersura-sura maka kerina manusia selamat. Tuhan simasu-masu.
Bujur ras mejuah-juah:
Pdt. Sahabat Perangin angin MTh
GBKP Rg Pd Gede